صورة ..."الامام علي بن ابي طالب"... تزين غلاف الديوان، وتتربع على عرشه، كيف لا!... وهو هامة دينية، فكرية، فلسفية، وإنسانية بحد ذاته.
توقفت قليلاً ونظرت الى جمال الوجه، والطلة البهية مما جعلني أردد ما قاله مالىء الدنيا وشاغل الناس الشاعر ..."ابو الطيب المتنبي"...:
بَيني وَبَينَ أَبي عَلِيٍّ مِثلُهُ
شُمُّ الجِبالِ وَمِثلَهُنَّ رَجاءُ
ناجى البعيني ..."الامام علي بن ابي طالب"... بلغة المزامير، وهي لغة ..."الكتاب المقدس"...، وكان مراده التقرب اليه بلغة السلام والقداسة ليطلق نور الفلسفة، والحكم القيّمة، والأقوال المأثورة، التي ملكت روحه وقلبه، فأطلق لها العنان ورددتها الأجيال وما زلنا نرددها حتى اليوم، وسأترككم مع مقتطفات من مزامير البعيني التي لا تحتاج الى تفسير:
إِسْمَكْ، رَسْمَكْ، جِسْمَكْ.. عِنْدي
تَالُوت مْقَدَّسْ.. مِنْجَلّ
مْفَكِّرْ، عَالِمْ، وَاعِظْ، جِنْدي
سَيِّد.. ما في كِلْمِه تْدِلّ
...
مِنْ فَلْسِفْتَكْ، مِنْ أَقْوالَكْ
شَعِّتْ شِمْس.. وْطِلْع نْهارْ
...
.. وْهَاكِ الْوَقْفِه فَوْقِ الْمَنْبَرْ
حِمْلِتْنا عَ جْناحِ الرِّيحْ
كِنَّا بْرَفْعِةْ إِيدَكْ نِكْبَرْ
يا عَلِي.. وْتِعْلا تْسَابيحْ
...
مُشْ جايي للصَّحْرا بَسّ
لْناس.. بْيِحْكوا بِلْسانَكْ
جايي تْكَحِّلْ عَيْن الشَّمْسْ
وِتْلَوِّنْها بْإِيمانَكْ
...
يا قِدِّيس القِدِّيسينْ
يا مْرَجّعْ يَسوع الْحُبّ
وِحَّدْت بْكِلْماتَكْ دِينْ
فِرْحِتْ فيه عْيُون الرَّبّ
...
دينَكْ دِيني، دين الْحُبّ
الْحُبّ اللّي بْيِجْمَعْ أَكْوانْ
ما بْيِظْلُمْ مَخْلُوق الرَّبّ
اللّي بْيِظْلُمْ هُوِّي الشَّيْطانْ
...
شو الإِنْجيلْ؟!.. وْشو الْقُرْآنْ؟
كتْب.. وْنِزْلِتْ كِرْمالي
فِسَّرْتا، قلتْ: الدَّيّانْ
واحِدْ.. تا تْرَيِّحْ بالي
...
قُلْتِلِّي: لا تْصارِعْ حَقّ
الْحَقِّ بْيِرْبَحْ مَهْما كانْ
...
وْقُلْتِلِّي: "الْباطِلْ مَغْلُوبْ
وَمَغْلوب الْغالِبْ بِالشَّرّ
...
الْحُقْد اللّي بْصَدْرَك تْقيلْ
شِيلُو، بِتْشيلُو مْنِ النّاسْ
وْبَعِّدْ عَنُّو مَلْيونْ مِيلْ
وْلا تِلْبُسْ لِلشَّرِّ لْباسْ
...
لا تْصاحِبْ واحِدْ كَذَّابْ
وْلا الْـ بِيعانُوا مِنْ بُخْلُنْ
وْعود الْكَذّابين سْرابْ
وِالْبُخْلا.. اغْتَنْيُوا بْجَهْلُنْ
...
كِلْماتَكْ.. يا نبعِ الْخَيْرْ
.. عَمْ تِسْقي فينا بْساتينْ
كِلْماتَكْ.. يا صَوْتْ الطَّيْرْ
.. هِدْيِتْ بِالْحَقّ مْلايينْ
